秋风起,打炭炉,唔使担心冻大脾

广州百事通2020-07-06 12:20:17



广州一阵秋风起,即时冻嚫只大脾


寻日急降到18度
整个广州都变咗只急冻鸡脾

着得再厚,都无法抵挡内心嗰种寒意
简直想即刻打个边炉,抚慰下
我受(ji)伤(e)的(de)小(xiao)心(du)灵(zi)
讲起打边炉,作为识食嘅老广,梗係要拣
打炭炉
地道炭炉边度正?
唔好眨眼,来啦喂
哞哞党
挚爱牛杂煲
1
牛杂大王
  作为黄埔老牌炭炉牛杂煲,牛杂、牛腩样样入味,冇牛肺牛血啲咁嘅下等料,炸云吞都几好食,唔早啲去霸位都要等好耐。不过可能因为名气太大,呢两年价格升得有啲快,差唔多成100蚊/煲。仲有网友反映话萝卜多咗,不过秋天干燥,食多啲萝卜打边炉都冇咁燥热啦。
小编心水指数: ★★★☆☆
地址:黄埔区大沙西139号
电话:82284206
邦记牛杂火锅专门店
  呢间喺员村嘅牛杂煲店店面真係几滴色,不过胜在牛杂够新鲜,件件厚切,足够4人份,价钱经济又实惠,牛肠都好干净。萝卜焖得够腍够入味,去迟啲都卖晒。到凌晨2至3点人流都好旺,简直係员村一带秋天宵夜首选,不过都係嗰句,早啲去霸位啦。
小编心水指数: ★★★★☆
地址: 天河区员村二横路员村子富新村场地自编1号(诸葛烤鱼斜对面、近江边临江大道)
电话: 13073050928
3
九记牛腩牛杂煲
  斋睇图都知,牛腩牛杂煲啲料满到就来涌出来,小编抹下口水先。“牛杂三友”---面筋、萝卜、豆卜打地基,上面摆满大嚿牛腩和牛杂,满满一煲,够晒诚意。牛腩嫩滑香腍唔黏牙,萝卜面筋豆卜索晒牛香味,汤底浓郁而不过咸。虽然店面真係几细,位置亦不显眼,但係一到六点就要等位,而且室内位置有限,如果唔想喺室外一边索鼻涕一边食,就要早啲啦。
小编心水指数: ★★★★★
地址:海珠区前进路基立村站
电话:84003037
咩咩党
滋补羊肉煲
大乡里火锅
  呢间店每年只开8个月,8月开到第二年5月,最夸张嗰阵整条蓬莱路停满晒车,个个坐喺路边来吃。 佢哋只选用新疆、甘肃同海南嘅新鲜山羊。大厨会先将整只羊放到羊汤里浸熟,人客落单后,再用海鲜酱、柱候酱,加入大葱爆炒,最尾放进加了羊汤的瓦煲入边,汤滚肉浮即能入口。酱料加入干柠檬叶,带走羊肉油腻,羊味香浓,啖啖惹味。
小编心水指数: ★★★★☆
地址: 荔湾区蓬莱路70号(近恩宁路)
电话: 81818445
百家熟食店
  听讲秋风起,骑楼同羊腩香更配哦,“百家”係好多人嘅宵夜之选。煲底用料丰富,大蒜、冬瓜、炸芋头、炸支竹样样有,加入特制酱料后更加香气浓郁。羊腩放入煲中滚十几分钟,变得腍软却依然皮肉相连。配着特调酱汁,羊肉入口香浓而唔臊,软而不韧。炸芋头吸收晒汤汁同羊肉嘅精华,轻轻一咬,芋香同酱香喺舌尖释放开来。如果怕风大,都可以坐喺室内,一样够通风,唔怕俾炭炉焗嚫。
小编心水指数: ★★★★☆
地址: 越秀区大新路339号
电话: 81062193
清心-传统炭炉羊肉煲
  河南老字号“清心”炭火羊肉煲店,人气旺到带旺埋隔离。 羊肉新鲜,现点现斩,完全冇雪藏味。羊腩用柱侯酱同秘制酱料腌制过,同大蒜一起爆香之后,放入砂煲中加入高汤炆煮。汤底入边嘅马蹄竹蔗辟晒羊肉啲臊味,清热得来又带出汤嘅鲜甜同。羊肉肥瘦相宜,配合特调甜酱、蒜蓉辣椒酱同腐乳酱一起吃,一口满足,根本停唔到口。最尾加两包华丰,配埋生菜,汁都捞埋,正啊。你冇睇错,可以外卖!可以外卖!可以外卖!重要嘅事讲三次,啱晒我哋啲季节变化引起嘅暂歇性行动不便人士。
小编心水指数: ★★★★★
地址: 海珠区 南华中路(近解放桥脚)
电话: 去到揾老板摞╮(╯▽╰)╭
呃唔知点叫党
鹅肉煲
1
广记餐厅
  讲起鹅煲,又点少得广记啊,虽然大排档环境,但係一谂起佢啲掌翼煲,嗰阵熟悉嘅味道又涌现出来。掌翼煲要煲到腍先至最好味,酱汁中的鲜味渗透入到掌翼中之后,鹅掌软滑,越嚼越上瘾,鹅翼软而不烂。不过近年掌翼煲价格升咗,料亦都冇咁多,但係粤味传统依然不变。
小编心水指数: ★★★★☆
地址: 越秀区万福路154号宗德宾馆1楼(近文德路)
电话: 83333805
咯咯党
清润鸡煲
1
无名炭炉鸡煲
  呢间神秘老店喺条黑麻麻巷仔度,一般人好难揾得到,不过绝对係好多老广嘅回忆。由巷内搬到巷口,成为咗种巷嘅唯一路标,店主都係坚持选用新鲜清远鸡,即点即劏即煲。两倍清补凉加三倍去核红枣做嘅汤底,在翻腾中不断同只鸡发生美妙的化学作用,即使用嘅係不锈钢锅,都难掩鲜味。夹一嚿嫩滑清远鸡,肥而不腻,就住鲜美浓郁鸡汤一起落肚,嗰种"无言的感动"啊。清补凉汤底清润滋补唔热气,最啱宜家初秋食。
小编心水指数: ★★★★★
地址: 荔湾区 恩宁路钟巷7-9号
电话:去到揾老板摞╮(╯▽╰)╭

牛、羊、鹅、鸡炭煲滋味各不同
识食嘅你中意喺秋天食边一款?
嗱嗱声话俾我哋知啦


合作或建议,联系QQ:3077911403