越秀篇 老广的美食回忆!

广州大城小事2019-05-28 20:12:45


正值暑假
令小编不禁回想起几年前果段日子


每日鼓励小编晨早流流去图书馆温书嘅
除咗係希望考到大学嘅迫切愿望之余
仲有就係图书馆附近实在有太多好嘢食啦!!
食少日都觉得个嘴太!空!虚!


早上8点几9点嚟到文明路
可以好他条咁食个早餐等图书馆开门
早餐有好多选择
不过小编都有自己嘅心水

最出名嘅三星汤,爽嫩嘅牛三星,配上酸辣萝卜粒,够晒鲜甜!够晒和味!唯一不足就係咸咗少少,而且腰比较少,肝比较多。
早餐嚟翻个牛腩/牛杂陈村粉,够晒醒神!D牛腩又淋又入味,再加埋浓稠嘅腩汁、芝麻、甜酱、辣椒酱,细份真係唔够食!
虽然铺面比较简陋,服务态度唔係几好,但嚟到老字号,食嘅就係回忆!每次经过,无论饿唔饿,都会行入去食翻碗三星汤。
地址:越秀区越秀南路161号(芬兰浴馆对面)
人均:15蚊

小编最爱蟹籽云吞面,有四大粒大云吞,咬落去满满嘅猪肉同short short声嘅蟹籽,D面係全蛋面,完全冇碱水味~重点係个汤底,够晒鲜~有虾米嘅味道!
睇图都知道E度嘅炸酱面好多炸酱!微酸带点辣嘅酱令人好开胃!再加D虾米汤落去捞几下,小编完全可以秒杀成碟嘢!
相对于其他老字号面店,小编觉得才福嘅性价比较高,8蚊就有碗鲜肉云吞面,家下係广州好少见啦~除咗蛋面,E度仲有伊面,可以同长寿路嘅坚记媲美!
地址:越秀区德政中路238号
人均:10蚊


食完丰盛嘅早餐
就可以安心咁入图书馆拼搏啦
听D专家讲用脑多嘅人特别容易饿
所以到咗12点几,小编又出嚟觅食
中午小编多数会选择比较饱肚嘅米饭
唔係普通嘅碟头饭,而係……

煲仔饭之中,小编最爱牛肉窝蛋,掀开煲盖,饭香扑鼻而来,先嚟一块又滑又嫩嘅牛肉,跟住再将生鸡蛋同D饭捞匀,将一啖畀蛋液包围住嘅饭焦放入口中,真係好鬼死满足!
係等煲仔饭嘅同时,可以饮翻碗汤,小编唔钟意复杂,最钟意嘅係最简单嘅猪红汤。汤同猪红嘅份量够晒大,落埋胡椒粉,提升汤嘅鲜味,果然简单嘅就係最好嘅!
作为广州老字号煲仔饭店之一嘅万兴,时代在变,不变嘅係佢嘅食物品质。店铺没有华丽嘅装修,却充满老广嘅美味。就算天气再热,小编仲係愿意係度食完个煲仔饭再去叹空调!
地址: 越秀区万福路289号(近文德路)
人均:24蚊

事实上小编唔係好钟意食腊味,但E度嘅腊味煲仔饭却令小编回味无穷,腊味特有嘅味道渗透入米饭里面,令到每粒米饭上面都闪耀着腊味嘅油光。或者嚟个腊味双拼,可以一次满足食货嘅两个要求,满足!
E度嘅煲仔饭好正,又几正?正到饭焦都可以成块掀起!斋望住眼前嘅金黄,唔洗食都知道又香又脆!唔食真係对唔住自己啦!
虽然超记嘅位置好偏僻、好难搵,係老居民区里面,而且店面比较狭窄,但係都无法减少一众食货对于寻觅美食嘅热情,唔少老友记一食就係好几年,原来美食真係会令人上瘾!
地址:越秀区北京南路星光广场(近仓前直街)
人均:20蚊


时间不经意间流逝
距离小编高中毕业原来已经过咗四个年头
出嚟工作后,就少咗过中图
每日都係“屋企—公司—屋企”三点一线
尽管生活望上去过得有D繁忙,甚至枯燥
但对于食,小编依然好讲究
落班后,小编会去食……

冇胃口嘅时候,小编钟意嚟E度食翻碗用料超足嘅咸瘦肉粥,好食得嚟仲可以聚火!
再配上新鲜滚热辣嘅咸煎饼,外圈软,中间脆,配料咸中带甜,风味独特!放落粥度食又得,斋咁食都得,得咗!
尽管E家有好多间连锁肠粉粥店遍布街头,但唔係间间都有咸瘦肉粥同咸煎饼食!老字号历经年代洗礼,始终如一,店内嘅一台一凳如是,地道嘅老广美食亦如是。
地址:越秀区海珠南路157号(近陈仲生牙科诊所)
人均:15蚊

外脆内嫩嘅咸猪手、松化嘅沙拉猪扒、鲜嫩嘅白灼牛肉都係E度嘅招牌菜,对于食肉兽小编嚟讲,真係够晒皮!
老同学聚餐嘅首选,皆因E度碟头够晒大,价格又十分亲民!虽然係老牌粤菜餐馆,但菜色新颖,选择又多,啱晒年轻人嘅口味!但E度真係好难等位!再加上小编係个好有原则嘅人,就算等到位,猪手冇晒都唔会入去食,所以要食好嘢,唔想等位,记得要提前订位!
地址:越秀区惠福东路417号(近教育路)
人均:56蚊

7蚊自选两个肉嘅米粉,加上用油爆香过嘅蒜蓉末,人间美味!外脆内嫩嘅蒜香鸡翼,边食里面嘅肉汁边流出嚟!酱爆掌中宝,十分爽口十分惹味!
小 编觉得,係巷仔嘅宵夜档,环境越lar渣越有风味!店面后面,仲设有“空调雅座”,小编同朋友帮佢起咗个名叫“水帘洞”,算係坐得比较舒服。係度同班老友 啤啤佢,再配上几味够晒镬气嘅小炒,日头嘅工作压力完全冇晒,真係好梳乎!最重要7蚊两个肉嘅米粉外面真係搵唔到啦!!E度真係大件夹抵食!!
地址:越秀区北京南路西横街(骏田批发广场旁)
人均:30蚊

炒奶糊、炼奶龟苓膏、香芋红豆沙都係小编嘅爱!细细嘅一碗甜品蕴含无限嘅美味。
E头嘅糖水老字号。每次经过店门口,都有扑鼻而来香浓嘅奶香味,行入店内,香味更加强烈,萦绕係身旁。E度嘅奶制品係绝对嘅香醇,搞到小编咁大个都好似未戒奶咁,食几多都唔够!
地址: 越秀区光塔路93号102铺(近海珠中路)
人均:10蚊


小编以上介绍到嘅美食店
又有冇属于你嘅点滴回忆呢?
如果有,唔好再霖啦
快D再去食多几次!
如果冇,都唔好霖啦
快D去试下啦!


仲有边D我遗留咗嘅,快D评论补充返

下次我去食埋佢,约吗!

同埋下次你想我介绍边个区?边D铺?


部分图片来源于网络