【撑小店】杜汶泽贴文撑鱼蛋小档 被领展迫结业再重开

睇香港2019-07-02 19:43:54

杜汶澤喺奇妙電視教煮食,當然係識食之人。

香港地連食碗地道魚蛋都好難,大埔冬菇亭出名賣魚蛋粉嘅廣成麵家,今年2月情人節前因拒絕接受領展無理要求而被迫結業,最近才搬址再開舖。一向撐小店的杜汶澤即刻去幫襯買魚蛋,仲喺fb貼文鬧領展無良,惡過老黑……


齋食魚蛋魚片太單調,杜汶澤就配埋米粉同菜煮個自家魚蛋米粉嚟食。

杜汶澤廚藝了得係人都知,估唔到佢買碗魚蛋粉都要自己加料,佢今日喺大埔廣成麵家新址買咗碗剩魚蛋魚片返屋企,竟然自己配上魚湯、米粉同菜心,變成一碗魚湯魚蛋米。

杜汶澤

杜汶澤同時寫咗幾句感想:「無良領展迫害小店系列之人人頭上一片天,寶鄉街上有廣成!」

「人地(哋)老老實實做魚蛋,你就話人無創意,要人攞兩三球出泥(嚟)裝修,真係惡過老黑…」

「依家人地(哋)開街鋪(舖),唔使比你摙住個X。嗱,我就覺得好好食!好有魚味!」


杜汶澤大罵領展惡過老黑。

點解杜汶澤咁撐呢間小店呢?事緣呢間舖喺大埔廣福邨冬菇亭屹立咗31年,但今年初商討續租時,領展講明唔能夠再做魚蛋粉生意,賣咗31年魚蛋叫佢唔好賣?老闆王贊強就決定喺2月13日結業。直至6月底至喺大埔寶鄉街重開,有段咁嘅歷史,唔怪得杜汶澤老遠都去幫襯啦!


呢間小店已有31年歷史,由上一代做到而家。